asman khol diya pairon men rahen rakh diin
phir nasheman pe usi shaḳhs ne shaḳhen rakh diin
jab koi fikr jabin par hui raqsan main ne
ḳhvab ankhon men rakhe ankhon pe palken rakh diin
darmiyan ḳhamushi pahle to na aa.i thi magar
baton baton men hi us ne ka.i baten rakh diin
us ne jab toḌ diye saare ta.alluq mujh se
khinch kar siine se phir main ne bhi sansen rakh diin
meri tanha.i se tang aa ke mire hi ghar ne
aaj thak-har ke dahliz pe ankhen rakh diin
Leave a Reply