Aashna-E-Dard Tu Ai KHugar-E-Ishrat Nahin

Poet

ashna-e-dard tu ai ḳhugar-e-ishrat nahin

lazzat-e-gham ke barabar dusri lazzat nahin

qadr-o-qimat dil ki hai jab tak hai is men mauj-e-dard

jis men rang-o-bu us gul ki kuchh vaq.at nahin

nala-e-shab-gir ho pur-josh ho tufan-e-ashk

abr-e-baran ki bhi is ke samne qimat nahin

lutf-e-dard-e-dil se to hai be-ḳhabar ai charagar

is jahan men is se baḌh kar dusri ne.amat nahin

ye jigar baaqi hai gham ki mehmani ke liye

dil subuk-ḳhatir hai is men ḳhuun ki rangat nahin

dil diya hai jis ko vaa.iz hai hamen us ki talash

hur-e-jannat se shanasa.i nahin ulfat nahin

daulat-e-duniya-e-dun sarchashma-e-afkar hai

badshahi ko faqiri se koi nisbat nahin

ziist men meri kami thi ik gham-e-jan-kah ki

mil gaya qismat se vo bhi ab koi hasrat nahin

ho gaya afsos ‘hafiz’ na-murad-e-arzu

DhunDhta hai aur kahin taskin ki surat nahin