qabr par bad-e-fana aiyega
be-mahal paanv na phailaiyega
laakh ho vasl ka vaada lekin
vaqt par saaf nikal jaiyega
jaaen dam bhar ko to farmate hain
chhavni to na kahin chhaiyega
sar hue is ke mulammaa se na aap
zulf-e-mushkin se khata paiyega
na karen aap vafa ham ko kya
bevafa aap hi kahlaiyega
uth gaya dil se dui ka parda
chhup ke ab aap kahan jaiyega
kahkashan saaf banega rasta
aap tausan ko jo chamkaiyega
rang laegi nazakat badh kar
phuul ke baar se pattaiyega
kya karen vasf-e-dahan darte hain
munh men jo aaega farmaiyega
zulf ko haath lagaenge jo ham
bediyan paaon men pahnaiyega
dekhen raghbat se to kahta hai vo shokh
koi halva hai ki kha jaiyega
kya kiya ishq ne kyuun hazrat-e-dil
ham na kahte the ki pachhtaiyega
aap chalte to hain atkheliyon se
koi aafat na kahin laiyega
ai ‘saba’ ishq-e-pari-ruyan men
adamiyyat se guzar jaiyega
Leave a Reply