Zafar Kaleem
phula-phala shajar to samar par bhi aa.ega
lekin isi lihaz se patthar bhi aa.ega
halat jab bhi shahr ke filma.e ja.enge
parde pe mere qatl ka manzar bhi aa.ega
be-chehra phir raha huun magar is yaqin ke saath
a.ina mere qad ke barabar bhi aa.ega
kab tak koi chhupega adavat ke ghaar men
dushman kabhi to samne khul kar bhi aa.ega
be-vaj.h ranjishon se dilon ko bacha.iye
zehnon ka bhed-bhav labon par bhi aa.ega
behtar hai dosto ki yahin Daal do paḌav
aage baḌhe to shahr-e-sitamgar bhi aa.ega
ubhrenge pastiyon se bhi ik roz ham ‘zafar’
uncha.iyon pe apna muqaddar bhi aa.ega
Leave a Reply