Aarzuon Ne Uchhal-Kud Machai Hui Hai

ārzūoñ ne uchhal-kūd machā.ī huī hai

jab se tujh tak mirī chāhat kī rasā.ī huī hai

mujh se isrār hai dil kā ki banūñ sahrā.ī

ḳhaak nādān ne siine meñ uḌaa.ī huī hai

duur se tāpne vaale bhī jhulas sakte haiñ

terī ra.anā.ī ne vo aag lagā.ī huī hai

rah ke siine meñ mire terā taraf-dār hai dil

saarī paTTī tirī āñkhoñ kī paḌhā.ī huī hai

ḳhush-numā manzaro itrāo na itnā ḳhud par

yaar ne zulf-e-hasīñ ruḳh pe girā.ī huī hai

ahl-e-taḳh.īl tasavvur meñ jise chhū na sakeñ

maiñ ne vo shakl nigāhoñ meñ basā.ī huī hai

Leave a Comment