Mannan Bijnori
arzuon ne uchhal-kud macha.i hui hai
jab se tujh tak miri chahat ki rasa.i hui hai
mujh se israr hai dil ka ki banun sahra.i
ḳhaak nadan ne siine men uḌaa.i hui hai
duur se tapne vaale bhi jhulas sakte hain
teri ra.ana.i ne vo aag laga.i hui hai
rah ke siine men mire tera taraf-dar hai dil
saari paTTi tiri ankhon ki paḌha.i hui hai
ḳhush-numa manzaro itrao na itna ḳhud par
yaar ne zulf-e-hasin ruḳh pe gira.i hui hai
ahl-e-taḳh.il tasavvur men jise chhu na saken
main ne vo shakl nigahon men basa.i hui hai
Leave a Reply