araish-e-khayal bhi ho dil-kusha bhi ho
vo dard ab kahan jise ji chahta bhi ho
ye kya ki roz ek sa gham ek si umiid
is ranj-e-be-khumar ki ab intiha bhi ho
ye kya ki ek taur se guzre tamam umr
ji chahta hai ab koi tere siva bhi ho
tuute kabhi to khvab-e-shab-o-roz ka tilism
itne hujum men koi chehra naya bhi ho
divangi-e-shauq ko ye dhun hai in dinon
ghar bhi ho aur be-dar-o-divar sa bhi ho
juz dil koi makan nahin dahr men jahan
rahzan ka khauf bhi na rahe dar khula bhi ho
har zarra ek mahmil-e-ibrat hai dasht ka
lekin kise dikhaun koi dekhta bhi ho
har shai pukarti hai pas-e-parda-e-sukut
lekin kise sunaun koi ham-nava bhi ho
fursat men sun shaguftagi-e-ghunche ki sada
ye vo sukhan nahin jo kisi ne kaha bhi ho
baitha hai ek shakhs mire paas der se
koi bhala sa ho to hamen dekhta bhi ho
bazm-e-sukhan bhi ho sukhan-e-garm ke liye
taus bolta ho to jangal hara bhi ho