Junun-e-Ishq Ka Jo Kuchh Hua Anjam Kya Kahiye

Akhgar Mushtaq Raheem Aabadi

junun-e-ishq ka jo kuchh hua anjam kya kahiye

kisi se ab ye rudad-e-dil-e-nakam kya kahiye

phiri kyuun kar nigah-e-saqi-e-gulfam kya kahiye

bhari mahfil men asbab-e-shikast-e-jam kya kahiye

ye kaisi dil men hai ik zulmat-e-be-nam kya kahiye

bujha kyuun daf.atan az-ḳhud charagh-e-sham kya kahiye

taghaful par vo do harf-e-shikayat bhi qayamat the

zamane bhar ke ham par aa gae ilzam kya kahiye

mira dard-e-nihan bhi aaj rusva-e-zamana hai

ik ah-e-zer-e-lab bhi ban gai dushnam kya kahiye

dar-o-divar par chhae hue hain yaas ke manzar

dayar-e-namuradi ke ye sub.h-o-sham kya kahiye

jahan-e-arzu bhi rafta rafta ho chala viran

ik aghaz-e-hasin ka aah ye anjam kya kahiye

umid-o-yas men ye roz-o-shab ki kashmakash tauba

ba-har-lamha fareb-e-gardish-e-ayyam kya kahiye

ye kis ke dar se ta.ane mil rahe hain sajda-o-sar ko

ye kis dar par hai zauq-e-bandagi badnam kya kahiye

kahan ka shikva-e-gham ham to bas shukr-e-sitam karte

magar shukr-e-sitam ka bhi hai jo anjam kya kahiye

ada-e-bad-gumani bhi sarisht-e-ishq hai lekin

ye kyuun kar ban gai minjumla-e-ilzam kya kahiye

rahenge hashr tak mamnun-e-ehsan-e-dil-azari

ḳhulus-e-ishq par ye qimti in.aam kya kahiye

baḌhi jaati hai ab to aur bhi kuchh duri-e-manzil

achanak nau-ba-nau-dushvari-har-gam kya kahiye

vo apni sai-e-tajdid-e-junun bhi raegan Thahri

bas ab aage ma.al-e-hasrat-e-nakam kya kahiye

na samjhe aaj tak rang-e-mizaj-e-yar-e-be-parva

magar phir bhi zaban par hai usi ka naam kya kahiye