aap be-kar ulajh baiThe hain taqdir ke saath
pahle paḌhiye to zara sabr ko tafsir ke saath
maslahat hai ki mohabbat hai ghazab hai jo hai
dekh divar utar aa.i hai tasvir ke saath
muflisi aa ga.i is baar bhi aaḌe varna
laziman phuul bhi milte tujhe tahrir ke saath
kya hi achchha tha shah-e-vaqt ki aisa hota
dukh filistin ka bhi hota tujhe kashmir ke saath
sujhta hai kabhi ‘faisal’ jo kinara karna
laakh ḳhadshat janam lete hain tadbir ke saath
Leave a Reply