ankhon se kisi khvab ko bahar nahin dekha
phir ishq ne aisa koi manzar nahin dekha
ye shahr-e-sadaqat hai qadam soch ke rakhna
shane pe kisi ke bhi yahan sar nahin dekha
ham umr basar karte rahe ‘mir’ ki manind
khidki ko kabhi khol ke bahar nahin dekha
vo ishq ko kis tarah samajh paega jis ne
sahra se gale milte samundar nahin dekha
ham apni ghazal ko hi sajate rahe ‘rahat’
aina kabhi ham ne sanvar kar nahin dekha
Leave a Reply