ankhon men ḳhvab taaza hai dil men naya ḳhayal bhi
aur jo mehrban rahe gardish-e-mah-o-sal bhi
milne ki ehtimam tak ham tire muntazir rahe
ab to nahin raha magar milne ka ehtimal bhi
vaqt kahan ruka bhala par ye kise guman tha
umr ki zad men aa.ega tujh sa pari-jamal bhi
us ne diye the phuul jo ab use kya dikha.iye
rakhta nahin hai jabki dil ḳhvahish-e-indimal bhi
ḳhvab-e-jamal taza-tar aaya tha chor ki tarah
khurach ke dil se le gaya aap ke ḳhad-o-ḳhal bhi
laao to main hi Taank duun taare ko asman par
mere hi haath se agar hona hai ye kamal bhi
Leave a Reply