ankhon men kahin us ke bhi tufan to nahin tha
vo mujh se juda ho ke pasheman to nahin tha
kyuun mujh se na ki us ne sar-e-bazm koi baat
main sang-e-malamat se gurezan to nahin tha
haan harf-e-tasalli ke liye tha main pareshan
pahlu men mire dil tha kuhistan to nahin tha
kyuun rasta dekha kiya us ka main sar-e-sham
be-dard ka mujh se koi paiman to nahin tha
jalva tha tira aag men har lahza huvaida
varna mujhe jal marne ka arman to nahin tha
tha dil bhi kabhi shahr-e-tamanna se mumasil
ye qarya hamesha se bayaban to nahin tha
tufan-e-alam kyuun mujhe sahil pe utara
main shor-e-talatum se hirasan to nahin tha
rakkha tha chhupa kar jise alfaz men main ne
parde men suḳhan ke bhi vo uryan to nahin tha
kahte hain ki hai ‘arsh’ nigun paa.e nabi par
aisa vo koi sahab-e-iman to nahin tha
Leave a Reply