ankhon ankhon men mohabbat ka payam aa hi gaya
marhaba izn-e-vida-e-nang-o-nam aa hi gaya
afiyat ke naam vahshat ka payam aa hi gaya
lo ye afsana qarib-e-iḳhtitam aa hi gaya
kam se kam jazb-e-vafa itna to kaam aa hi gaya
be-irada un ke lab par mera naam aa hi gaya
shaiḳh ka sab zohd-o-taqva aaj kaam aa hi gaya
jab vo mina-e-ravan sahba ba-jam aa hi gaya
mai-kade men jaane kya kya gul khilate shaiḳh-ji
vo to rindon ko ḳhayal-e-ehtiram aa hi gaya
umr-bhar jis ke liye ankhen rahi hain farsh-e-rah
vo ajal ka qasid-e-farḳhanda-gam aa hi gaya
naaz the kya kya uruj-e-nayyar-e-iqbal par
dopahar ke ba.ad dekha vaqt-e-sham aa hi gaya
alvida.a ai zo.am-e-hasti al-firaq ai vahm-e-zist
maut ban kar muzhda-e-umr-e-davam aa hi gaya
zabt-e-raz-e-gham pe sau janen bhi kar dete nisar
kya bata.en bas zaban par un ka naam aa hi gaya
husn ne bhi karvaTen badli hain ai dil rat-bhar
teri peshani se dagh-e-nang-e-ḳham aa hi gaya
jab kahin lutf-e-suḳhan ki baat aa.i hai ‘rashid’
e.atibarul-mulk ka har lab pe naam aa hi gaya
Leave a Reply