Aankh Se Aansu Dhalka Hota

aañkh se aañsū Dhalkā hotā

to phir sūraj ubhrā hotā

kahte kahte ġham kā fasāna

kaTtī raat saverā hotā

kashtī kyuuñ sāhil par Duubī

maujeñ hotīñ dariyā hotā

jo garjā pyāsī dhartī par

kaash vo bādal barsā hotā

phūloñ meñ chhupne vāloñ ko

kāñToñ meñ to DhūñDā hotā

tujh ko paanā sahl nahīñ hai

sahl jo hotā to kyā hotā

apne sau begāne hote

ek yagāna apnā hotā

pūchh ‘ziyā’ ye ahl-e-dil se

pyaar nā hotā to kyā hotā

Leave a Comment