Shakeel Badayuni
aankh se aankh milata hai koi
dil ko khinche liye jaata hai koi
vaae hairat ki bhari mahfil men
mujh ko tanha nazar aata hai koi
subh ko khunuk fazaon ki qasam
roz aa aa ke jagata hai koi
manzar-e-husn-e-do-alam ke nisar
mujh ko aina dikhata hai koi
chahiye khud pe yaqin-e-kamil
hausla kis ka badhata hai koi
sab karishmat-e-tasavvur hain ‘shakil’
varna aata hai na jaata hai koi
Leave a Reply