Poet
aankh khulne pe bhi hota huun usi ḳhvab men gum
der tak rahta huun ik lazzat-e-nayab men gum
soch hi soch men tufan uTha deta huun
aur ho jaata huun ik mauja-e-girdab men gum
ik sitara jo chamakta hai lab-e-bam kahin
dekhte dekhte ho jaata hai mahtab men gum
bach rahe saans to jaana hai unhin galiyon men
aur hona hai usi halqa-e-ahbab men gum
aise nashshe se siva aur nasha kya hota
aap ka ḳhvab jo ho jaata mire ḳhvab men gum
sajda-e-shauq ke mathon se nishan miTne lage
ho ga.i rasm-e-azan gumbad-o-mehrab men gum
gum to hona tha ba-har-hal kisi manzar men
dil hua ḳhvab men gum aankh hui aab men gum
Leave a Reply