andhi men bhi charagh magan hai saba ke saath
lagta he saz-baz hui hai hava ke saath
lab par khuda ka naam ho dil men vatan ka dard
nikle badan se ruuh miri is ada ke saath
un ko bahut ghurur tha apni jafaon par
ham bhi vahin ade rahe apni vafa ke saath
nazren jhuka ke samne mere khada hai vo
sharmindagi ki apne badan par qaba ke saath
har shakhs rashk karta hai phir aisi zaat par
mar kar bhi jis ke rabt ho qaaem khuda ke saath
aghaz bhi usi ki ziyarat ke saath ho
ho bhi safar tamam to maan ki dua ke saath
ehsan tha ya hukm ki taamil thi ‘sabin’
ham bi qadam qadam chale us ki raza ke saath
Leave a Reply