Tum KHafa Kya Hue Hayat Gai

Poet

tum ḳhafa kya hue hayat ga.i

jaan taskin-e-ka.enat ga.i

jab se murjha ga.i hai dil ki kali

raunaq-e-gulshan-e-hayat ga.i

saqiya sirf apne apnon par

bas tiri chashm-e-iltifat ga.i

haa.e be-chargi-e-fikr-o-nazar

vo bhi ta-hadd-e-mumkinat ga.i

ek aansu ki tarjumani se

azmat-e-gham ki saari baat ga.i

dard-e-dil men hui hai jab se kami

kya kahen lazzat-e-hayat ga.i

ham hi ham the kabhi nigahon men

ab kahan hai vo pahli baat ga.i

chain ab bhi kahan hai dil ko ‘vaqar’

be-qarari men saari baat ga.i