aana hai to aa jaao yak aan mira sahab
ik aan ke hain ham bhi mehman mira sahab
muddat se tumhara main sau jaan se huun ashiq
kyuun jaan ke hote ho anjan mira sahab
ghusse ho uThe mujh par kyuun tir-o-kaman le kar
main hone ko baiTha huun qurban mira sahab
nagah sanam yaaro mujh se jo mila aa kar
mujh par ye ḳhuda ka hai ehsan mira sahab
ye banda ho ya tum ho vaan ghair na ho koi
is Dhab ke hai milne ka arman mira sahab
kuchh yaad nahin mujhe ko kafir huun musalman huun
hai gham men tire yaan tak nisyan mira sahab
jo ishq ki manzil ke hain ahl-e-kamal un ka
hai shukr-o-shikayat men nuqsan mira sahab
saaf a.ina-e-dil men raushan hai jamal us ka
bar-aks hai ik aalam hairan mira sahab
sau tarah kahun dil ka ahval huzur us ke
mere to nahin rahne ausan mira sahab
ham ishq ki daulat se ik kunj-e-qana.at men
karte hain faqirana guzran mira sahab
yaan had se qadam bahar rakhne koi paaya hai
is jurm men sar len hain tavan mira sahab
munsif ho ‘muhib’ dil men is baat ko Tuk soche
jab be-sar-o-saman ho insan mira sahab
kya saath le aaya tha le ja.ega kya yaan se
phir chahiye kis ḳhatir saman mira sahab
ma.ani men vo kaTen hain auqat bahut be-gham
jo shaḳhs ba-surat hain uryan mira sahab
shamshir-e-barhana ke jauhar nazar aate hain
insaf ki ankhon ke darmyan mira sahab
Leave a Reply