amaj-gah-e-tir-e-sitam kaun ham ki aap
phir puchhte hain aap se ham kaun ham ki aap
dil husn par nisar to kar duun baja durust
jhelega is ke ba.ad sitam kaun ham ki aap
duniya se uTh chuka tha mohabbat ka e’tibar
qaa.em kiye hue hai bharam kaun ham ki aap
donon ne ittihad ki koshish zarur ki
lekin raha nibah men kam kaun ham ki aap
roz-e-jaza jo dad-talab honge dad-ḳhvah
us din karega uzr-e-sitam kaun ham ki aap
tufan-e-ashk-e-‘nuh’ ka rukna muhal hai
anjam de ye kar-e-aham kaun ham ki aap
Leave a Reply