aaj yuun hi sar-ba-sar dil bahut udaas hai
baat kuchh nahin magar dil bahut udaas hai
jism hai thaka hua hausla niDhal hai
aur sab se peshtar dil bahut udaas hai
shahr-e-mumkinat men ho ke na ummid main
phir raha huun dar-ba-dar dil bahut udaas hai
phir hansi ko dekh kar sab fareb kha ga.e
hai bhala kise ḳhabar dil bahut udaas hai
phir vo qurb-e-yar ho ya hansi ki mahfilen
kuchh nahin maza agar dil bahut udaas hai
kis adam ki aur hai is vajud ka safar
aaj ḳhud ko soch kar dil bahut udaas hai
ab tire saval ka kya javab duun bhala
baat ye hai muḳhtasar dil bahut udaas hai
yuun bhi tere dard ka bas yahi ilaaj hai
mai-kade men chal ‘amar’ dil bahut udaas hai
Leave a Reply