abdur-rauf-urooj

Aaj Yaadon Ne Ajab Rang Bikhere Dil Mein

aaj yadon ne ajab rang bikhere dil men

muskurate hain sar-e-sham savere dil men

ye tabassum ka ujala ye nigahon ki sahar

log yuun bhi to chhupate hain andhere dil men

surat-e-bad-e-saba qafila-e-yad aaya

zakhm-dar-zakhm khile phuul se mere dil men

yaas ki raat kati aas ka suraj chamka

phir bhi chamke na kisi roz savere dil men

ik miri vahshat-e-be-nam pe is tarah na soch

kitni baten hain jo khatki nahin tere dil men

dhyan ki shama ki lau tez bhi kar dete hain

aksar auqat tiri yaad ke phere dil men

na mili fursat-e-asaish-e-taabir-e-uruj

ek muddat se hain khvabon ke basere dil men

More Poems

Leave a Comment