aaj viraniyon men mira dil naya silsila chahta hai
shaam Dhalne ko hai zindagi ki ḳhuda aur kya chahta hai
dhuup ki niyyaton men bhaḌakne lage nafraton ke alaav
ai ghaTa is liye tujh ko mera badan oḌhna chahta hai
niind ki rahaton se nahin mutma.in silsila dhaḌkanon ka
phir dil-e-zar ra.ana.iyon men gundha ratjaga chahta hai
teri nazdikiyon ko pahan ke main shahzada lagne laga huun
chhu ke ranginiyan ab ke dekhun tiri jii, baḌa chahta hai
parvarish hauslon ki tamam umr mere lahu ne ḳhamoshi se ki
ab junun aks ko dekhne ke liye a.ina chahta hai
jo hatheli ki saari purani lakiron ko tabdil kar de
aisa ḳhush-rang har aadmi ab yahan saneha chahta hai
tum samundar ke sahme hue josh ko mera paigham dena
mausam-e-habs men phir koi aaj taaza hava chahta hai
umr bhar ansuon se jo dhota raha chehra mahrumiyon ka
vo tiri rahmaton se mire maula ab ke jaza chahta hai
naaz tha jis ko meri rifaqat ke har lamha-e-muḳhtasar par
aaj mahsus aisa hua hai ki vo fasla chahta hai
Leave a Reply