bhula hai baad-e-marg mujhe dost yaan talak
sag bhi na us ka aaya miri ustukhan talak
go ham qafas se ja na sake bostan talak
ud ud ke rang-e-chehra gaya par vahan talak
bulbul hujum-e-gul hai chaman men yahan talak
phulon se chha gaya hai tira ashiyan talak
kab pahunchi aah zoaf se gosh-e-butan talak
sau ja thahar ke siine se aai zaban talak
parvaz pesh aziin thi miri asman talak
ab to chaman se ja na sakun ashiyan talak
aisa kiya zaiif gham-e-intizar ne
ankhon ko meri baar hai khvab-e-giran talak
aalim huun ilm-e-ishq ka main kar na ham-sari
ai andalib tu hai padi bostan talak
us mah ke vasf se ye hua martaba buland
pahunchi miri ghazal ki zamin asman talak
pas-e-adab raha hai junun men bhi is qadar
aata huun sajde karta tire astan talak
us mast ke hain gesuon ke silsile men ham
saaqi murid jis ka hai pir-e-mughan talak
rakkhen adab se paanv na ham teri raah men
bahar jab aap se hon to pahunchen vahan talak
fasl-e-khizan men gul ka to aana muhal hai
bijli hi kaash aae miri ashiyan talak
kyunkar na sar phire mira us tegh ke liye
gardish si justuju men hai marg-e-nishan talak
sau baar apni fikr adam se pare gai
lekin na pahunchi yaar ke mu-e-bayan talak
us huur ka makan hai jannat se bhi pare
rizvan pahunch sake na kabhi pasban talak
is darja fart-e-zoaf se ham pichhe rah gae
pahunchi na aah bhi jaras-e-karvan talak
dil men hamare us ki mohabbat ne ghar kiya
pahuncha hai is makan se jo la-makan talak
allah re dimagh zara dekh ai huma
aaya na be-talab sag-e-yar ustukhan talak
us maah ne jo sar mira thukraya paanv se
pahuncha dimagh aaj mira asman talak
nakhl-e-murad-e-yar hua aaj barvar
sad shukr kat ke sar mira pahuncha sinan talak
phir jaae tiir aa ke vo bargashta bakht huun
rukh phere dekh kar mujhe us ki kaman talak
marne ke baad hai sag-e-janan ka intizar
kah do huma na aae miri ustukhan talak
sau baar aa ke maut bhi furqat men phir gae
bargashtagi nasib ki kahiye kahan talak
‘goya’ ye na-tavani ka ehsan mujh pe hai
aane diya na yaar ka shikva zaban talak
Leave a Reply