Shahab Jafri
hijr-o-visal-e-yar ka mausam nikal gaya
ai dard-e-ishq jaag zamana badal gaya
kab tak ye roz-e-hashr sun ai sham-e-intizar
kya raat ab na aa.egi suraj to Dhal gaya
ab ke kahan se aa.e ho savan ke badalo
dekho to saara baagh hi barkha se jal gaya
ja.un kahan ki taab nahin arz-e-naghma ki
paani men aag lag ga.i patthar pighal gaya
saton suron ke raag se jalti hai dil ki aag
bad-e-fana main bhi mira sho.ala sambhal gaya
us ki sada se raag nikale ‘shahab’ ne
ik shab lagi vo aag ki nadan jal gaya
Leave a Reply