Shahid Kamal
aaj phir ru-ba-ru karoge tum
mujh se kya guftugu karoge tum
mujh se loge mire lahu qisas
phir mujhe surḳh-ru karoge tum
haif ho meri bad-mizaji par
aap apna lahu karoge tum
tum ganva doge ek din mujh ko
phir miri justuju karoge tum
tum saf-e-dostan men ho lekin
phir bhi kar-e-adu karoge tum
zaḳhm par zaḳhm khaa.e jaate ho
aur rafu par rafu karoge tum
ham bhi maqtal men sar kaTa.enge
apne ḳhuun se vuzu karoge tum
ai miri jaan aib hai ye bhi
ham ko main tum ko tu karoge tum
main to ‘shahid’ bhi huun ‘kamal’ bhi huun
mere haq men ghulu karoge tum
Leave a Reply