aaj a.ine men jo kuchh bhi nazar aata hai
us ke hone pe yaqin bar-e-digar aata hai
zehn o dil karta huun jab ranj-e-jahan se ḳhali
koi be-tarah miri ruuh men dar aata hai
guftugu karte hue jaate hain phulon ke giroh
aur chupke se daraḳhton pe samar aata hai
bach nikalne pe mire ḳhush nahin vo jan-e-bahar
koi ilzam mukarrar mire sar aata hai
lauT jaane ki ijazat nahin dunga us ko
koi ab mere ta.aqub men agar aata hai
meri anhken bhi mayassar nahin atin mujh ko
jab mulaqat ko vo ḳhvab-e-sahar aata hai
meri qismat hai ye avara-ḳhirami ‘sajid’
dasht ko raah nikalti hai na ghar aata hai
Leave a Reply