aa.i ḳhizan chaman men ga.e din bahar ke
sharminda sab daraḳht hain kapḌe utaar ke
make-up se chhup sakengi ḳharashen na vaqt ki
a.ina saari baten kahega pukar ke
insan simaTta jaata hai ḳhud apni zaat men
bandhan bhi khulte jaate hain sadiyon ke pyaar ke
phir kya karega rah ke koi tere shahr men
raten hi jab nasib hon raten guzar ke
socha hai apne zaḳhmon ke angan men baiTh kar
sajde karunga naqsh-e-tamanna ubhar ke
tanha.iyon ka dard sameTe hue koi
‘farhat’ chala hai Thokaren duniya ko maar ke
Leave a Reply