lazim hai soz-e-ishq ka shola ayaan na ho
jal-bujhiye is tarah se ki mutlaq dhuan na ho
zakhm-e-jigar ka va kisi surat vahan na ho
paikan-e-yar is men jo shakl-e-zaban na ho
allah re be-hisi ki jo dariya men gharq hon
talab ki tarah kabhi paani ravan na ho
gul khanda-zan hai chahchahe karti hai andalib
phaili hui chaman men kahin zafaran na ho
bhago yahan se ye dil-e-nalan ki hai sada
bahke ho yaaro ye jaras-e-karvan na ho
hasti adam se hai miri vahshat ki ik shalang
ai zulf-e-yar paanv ki tu bediyan na ho
lena bajae fatiha turbat pe nam-e-yar
marne pe ye khayal hai vo bad-guman na ho
naaqa chala hai najd men laila ka be-mahar
majnun ki ban padegi agar sar-ban na ho
chalon se charkh ki ye mira azm hai ‘surur’
is sarzamin pe jaun jahan asman na ho