aah bargah-e-husn men jalvon ka asar dekh
had se na guzar zabt men ai zabt-e-nazar dekh
mat puchh ki kya guzri dil-sho.ala-sifat par
is dast-e-hina.i men mira daman-e-tar dekh
tu us ka tamanna.i hai mat Dar dil-e-nadan
ummid nahin phir bhi vo kahta hai to mar dekh
ye shahr hai ya ḳhema hai dushman ka sipah ka
avaz ke zaḳhmon se lahu hai mira sar dekh
kyuun bahr-e-ḳhamoshi men hai tu misl-e-sada tang
hasrat koi baaqi hai to ik baar ubhar dekh
shayad tire hisse men ho moti ka muqaddar
ai qatra-e-jan aaj samundar men utar dekh
kyuun paanv pasare tu paḌa hai sar-e-rahe
kya saḳht safar hai zara saa.e se idhar dekh
shayad ho idhar ‘arsh’ koi chashma-e-haivan
ik baar tu hasti ke bayaban se guzar dekh
Leave a Reply