Dard ghaTta Bhi Nahin Hai Ki Fana Ho Jae

dard ghaTtā bhī nahīñ hai ki fanā ho jaa.e

aur baḌhtā bhī nahīñ hai ki davā ho jaa.e

hai mujhe ilm ki ye ḳhvāb hai par ḳhvāb meñ hī

mere allāh use mujh se vafā ho jaa.e

us kā ehsān hī itnā hai merī sāñsoñ par

ġhair-mumkin hai ki sāñsoñ se adā ho jaa.e

vo kisī roz kare tark-e-ta.alluq ḳhud se

aur usī din se mirā sirf mirā ho jaa.e

laakh achchhā ho to merā jo nahīñ ḳhaak achchhā

is se achchhā hai ki tū sach meñ burā ho jaa.e

vaqt ko kar de qalam ḳhud ko syāhī kar de

terā sochā huā qismat kā likhā ho jaa.e

mujh ko mālūm hai vo shaḳhs merā hai lekin

hai ye lāzim ki ab us ko bhī patā ho jaa.e

Leave a Comment