Prabudha Saurabh
dard ghaTta bhi nahin hai ki fana ho jaa.e
aur baḌhta bhi nahin hai ki dava ho jaa.e
hai mujhe ilm ki ye ḳhvab hai par ḳhvab men hi
mere allah use mujh se vafa ho jaa.e
us ka ehsan hi itna hai meri sanson par
ghair-mumkin hai ki sanson se ada ho jaa.e
vo kisi roz kare tark-e-ta.alluq ḳhud se
aur usi din se mira sirf mira ho jaa.e
laakh achchha ho to mera jo nahin ḳhaak achchha
is se achchha hai ki tu sach men bura ho jaa.e
vaqt ko kar de qalam ḳhud ko syahi kar de
tera socha hua qismat ka likha ho jaa.e
mujh ko malum hai vo shaḳhs mera hai lekin
hai ye lazim ki ab us ko bhi pata ho jaa.e
Leave a Reply