Himayat Ali Shayar
aa.e the tere shahr men kitni lagan se ham
mansub ho sake na tiri anjuman se ham
bezar aa na jaa.en gham-e-jan-o-tan se ham
apne vatan men rah ke bhi hain be-vatan se ham
yuun be-ruḳhi se pesh na aa ahl-e-dil ke saath
uTh kar chale na jaa.en tiri anjuman se ham
ye sar-kashi junun nahin pindar-e-ishq hai
guzre hain daar se bhi usi bankpan se ham
mehr-o-mah-o-nujum ki manind roz-o-shab
har jaur-e-asman pe rahe ḳhanda-zan se ham
milte hain roz dast-e-saba se payam-e-gul
zindan men bhi qarib hain ahl-e-chaman se ham
‘sha.ir’ adab ke mohtasibon ko ḳhabar nahin
kya kaam le rahe hain taghazzul ke fan se ham
Leave a Reply