chhupa kar sab ki nazron se sada parde men rakkha hai
hazaron raaz aise hain jinhen siine men rakkha hai
kabhi sar ki kabhi jaan ki kabhi us zat-e-parvar ki
hamesha teri qasmon ne mujhe dhoke men rakkha hai
yahin se raah chunne ka sabaq dena zaruri hai
abhi bachpan kitabon ki tarah baste men rakkha hai
jahan ik dusre ko ham sada dushman samajhte hain
siyasat ne hamesha ham ko us paale men rakkha hai
kisi bhi vaqt sanson ki ye Dori TuuT sakti hai
hamara jism to har pal kisi khate men rakkha hai
andhera aa nahin sakta kabhi tanha.i ka ‘mashkur’
ujala teri yadon ka mire kamre men rakkha hai
Leave a Reply