aa ke mujh tak kashti-e-mai saqiya ulTi phiri
aaj kya naddi bahi ulTi hava ulTi phiri
aate aate lab par ah-e-na-rasa ulTi phiri
vo bhi mera hi dabane ko gala ulTi phiri
muḌ ke dekha us ne aur vaar abruon ka chal gaya
ik chhuri sidhi phiri aur ik zara ulTi phiri
la saka nazzara-e-ruḳhsar-e-raushan ki na taab
ja ke a.ine pe chehre ki ziya ulTi phiri
rast-bazon hi ko piisa asman ne raat din
va-e-qismat jab phiri ye asiya ulTi phiri
jo baḌa bol ek din bole the pesh aaya vahi
gumbad-e-gardun se Takra kar sada ulTi phiri
rizq kha kar ghair ki qismat ka zambur-e-asal
tu ne dekha halq tak ja kar ghiza ulTi phiri
tu sata.ish-gar hai us ka jo hai tera mad.h-ḳhvan
ye to ai mushfiq zamir-e-marhaba ulTi phiri
jis par aa.i thi tabi.at ki usi ne kuchh na qadr
jins-e-dil manind-e-jins-e-narava ulTi phiri
ya to kushi Dubti thi ya chali sahil se duur
vaa.e nakami phiri bhi to hava ulTi phiri
girne vaala hai kisi dushman pe kya tir-e-shahab
asman tak ja ke kyuun ah-e-rasa ulTi phiri
ji gaya main us ke aa jaane se dushman mar gaya
dekh kar iisa ko balin par qaza ulTi phiri
mar gaya be-maut main aḳhir ajal bhi duur hai
kucha-e-qatil ka batla kar pata ulTi phiri
hijr ki shab mujh ko ulTi saans lete dekh kar
ek hi dam men vahan ja kar saba ulTi phiri
hai mira virana-e-gham ‘nazm’ aisa haul-nak
mauj-e-sail aa.i to le kar boriya ulTi phiri
Leave a Reply