Barish KHushbu Rang Hawa Hain Main Aur Tu

bārish ḳhushbū rañg havā haiñ maiñ aur tū

ḳhvāboñ kā be-nām sirā haiñ maiñ aur tū

apnā ghar hai saat suroñ ke āñgan meñ

gītoñ kī āzād fazā haiñ maiñ aur tū

mannat kī ik Dorī haiñ pīpal se bañdhī

jal meñ bahtā ek diyā haiñ maiñ aur tū

jis ne janm diyā hai har afsāne ko

bhūlī-bisrī koī kathā haiñ maiñ aur tū

ek navelā lafz hazāroñ lafzoñ meñ

rañgoñ meñ ik rañg nayā haiñ maiñ aur tū

Leave a Comment