Aa Gae Mujh Mein Bhi Kuchh Rang Zamane Wale

aa ga.e mujh meñ bhī kuchh rañg zamāne vaale

ab mirī aañkh meñ aañsū nahīñ aane vaale

tum mirā naam jo ik baar zabāñ par le aao

ḳhud mire daam baḌhā deñge ghaTāne vaale

ab ke koī bhī tirī samt nahīñ aa.egā

sab ko har roz na.ī samt batāne vaale

ye jo shohrat ne mirā nām-o-nasab pūchh liyā

ab mujhe sar pe biThā.eñge girāne vaale

is liye sher kahūñ log tujhe pahchāneñ

dard de kar mirā māhaul banāne vaale

sab kahāñ jaan sakeñge mirā dil jāntā hai

un ke naḳhre bhī to haiñ naaz uThāne vaale

jab koī chiiz sambhālī nahīñ jaatī tujh se

tere hāthoñ meñ kabhī ham nahīñ aane vaale

Leave a Comment