Shohrat Bukhari
aa dil men tujhe kahin chhupa luun
logon ki nigah se bacha luun
kyuun tujh pe guman-e-be-vafa.i
kyuun apne hi dil ki bad-dua luun
divar-e-umid gir rahi hai
tasvir tiri kahan laga luun
aa.ine ki dhund saaf kar ke
kyuun ḳhud ko na hal-e-dil suna luun
ye fasle kaise ḳhatm honge
main kaise tujhe yahan bula luun
kaTte hi nahin pahaḌ se din
‘shohrat’ main use kahan se pa luun
Leave a Reply