Seema Naqvi
hijr jab tai hai to be-kar na hujjat karna
jaane vaale ko bahut pyaar se ruḳhsat karna
vo jo bheje the tiri mast nigahon ne payam
ek baar aur zara un ki vazahat karna
sab ke hathon men ye ejaz-e-masiha.i kahan
ek hi lams ka mansab hai karamat karna
ye to aisa hai ki is raah men chal paḌiye
ishq karna to baghair izn-o-ijazat karna
dard uThta bhi rahe aankh se chhalke bhi nahin
sikhte sikhte aata hai shikayat karna
ham ko adab-e-mohabbat nahin aate ‘sima’
ham ko bas TuuT ke aata hai mohabbat karna
Leave a Reply