tishna-labon ki nazr ko saughat chahiye
tere nisar thoḌi si barsat chahiye
itna bhi mai-kade pe na pahre biTha.iye
kuchh to ḳhayal-e-ahl-e-ḳharabat chahiye
aapas ki guftugu men bhi kaTne lagi zaban
ab doston se tark-e-mulaqat chahiye
muddat se chashm-o-dil men koi rabta nahin
kya aur tujh ko gardish-e-halat chahiye
kis kis ḳhuda ke samne sajda nahin kiya
kuchh sharm kuchh to abru-e-zat chahiye
zikr-e-pari-vashan ke zamane guzar ga.e
ab to ghazal men hamd-o-munajat chahiye
insaf ki ye aankh ye suraj ki raushni
yarab yahi hai din to mujhe raat chahiye
ham chahte hain dahr men jiine ka haq mile
un ko subut-e-farruḳhi-e-zat chahiye
kuchh bhi ho maslahat ka taqaza magar nadim
jo dil men ho zaban pe vahi baat chahiye
ai zulf-e-naz koi hava-e-fusun ka daam
ahl-e-nazar ko sair-e-tilismat chahiye
tab-e-kamand-e-kakul-e-ḳham-dar hoshiyar
khul kar na har kisi pe inayat chahiye
‘tahir’ jaza-e-himmat-e-ali hai zulf-e-yar
zulfon se khelne ke liye haat chahiye
Leave a Reply