jo hava hai surat-e-bad-e-muḳhalif tez hai
dil ka maidan hai ki ik sahra-e-afat-ḳhez hai
mere saaqi dam-ba-dam kyunkar bhara aa.e na dil
duur huun main aur saghar bazm men labrez hai
dukh uThane ki bhi aḳhir hoti hai kuchh intiha
bulbul-e-dil ka mire naghma bhi dard-angez hai
aamad aamad hai ḳhizan ki kyuun na ro.e andalib
gul abhi nau-kar hain sabza abhi nau-ḳhez hai
tere vahshi jaate hain uftan-o-ḳhezan su-e-dasht
ho junun dekhe se aisi chaal vahshat-ḳhez hai
kyuun na ro.en saikḌon tufan uTThe chaah men
ham na vaqif the ki bahr-e-ishq tufan-ḳhez hai
ab-e-ḳhanjar tu mila de to chhalak jaa.e abhi
umr ka saghar yahan ik umr se labrez hai
us pe marta huun mire marne ki hai jis ko ḳhushi
ariza vo hai ki jis se maut ko parhez hai
tuḳhm ulfat ka zamin-e-dil men bona kya zarur
log kahte hain ki ye to ḳhud mohabbat-ḳhez hai
ho jahan ma.ashuq vaan ashiq bhi hota hai zarur
yaan yuun hi roz-e-azal se husn-o-ishq aamez hai
naza.a men bhi matam-e-dil hai talash-e-yar hai
paanv hain chalak ab tak haath ab tak tez hai
kis takalluf se nibahi main ne ulfat aap ki
faḳhr karta huun ki mera ishq husn-amez hai
kaaT ke sar mera tum ne haath men laTka diya
dekho ye meri vafadari ki dastavez hai
kar diya hai mast saare ḳhuftagan-e-ḳhak ko
kya hua shahr-e-ḳhamoshan ki nashat-angez hai
hai ‘rashid’ ab tak giyah-e-lucknow mardum giyah
kya zamin hai jo ujaḌ jaane pe mardum-ḳhez hai
Leave a Reply