Farhat Shahzad
ham se tanha.i ke maare nahin dekhe jaate
bin tire chand sitare nahin dekhe jaate
harna din ka hai manzur magar jan-e-aziz
ham se gesu tire haare nahin dekhe jaate
dil phansa bhi ho bhanvar men to koi baat nahin
ranj men Dubte pyare nahin dekhe jaate
jin ke pairon men samundar the jhuka.e nazren
un ki ankhon men kinare nahin dekhe jaate
chhin le meri sama.at ki basarat ya-rab
un labon par mire na.are nahin dekhe jaate
jin ki aahaT se bandhi thi mire dil ki dhaḌkan
un nigahon ke ishare nahin dekhe jaate
tuur patthar tha mire dil ko dikha apni jhalak
phir ye kahna ki nazare nahin dekhe jaate
mah-e-kamil bhi jise dekh ke sajde men gire
aankh men us ki sitare nahin dekhe jaate
Leave a Reply