ada se aaḌ men ḳhanjar ke munh chhupa.e hue
miri qaza ko vo laa.e dulhan bana.e hue
ilahi kyuun nahin hoti koi bala nazil
asar hai der se dast-e-dua uTha.e hue
tiri laga.i hui aag hashr tak na bujhi
hue na mar ke bhi ThanDe tire jala.e hue
bala-e-jan hai magar phir bhi aarzu hai tiri
ham us ko apne kaleje se hain laga.e hue
sahar hui ki vo yadash-ba-ḳhair aata hai
charagh hain miri turbat ke jhilmila.e hue
tumhin kaho ki tumhen apna samajh ke kya paaya
magar yahi ki jo apne the sab para.e hue
kisi ka haa.e vo maqtal men is tarah aana
nazar bacha.e hue astin chaḌha.e hue
ajal ko muzhda-e-fursat ki aaj ‘fani’-e-zar
umid-e-vasl se baiTha hai lau laga.e hue
Leave a Reply