Kafir-E-Ishq Ko Kya Se Kya Kar Diya

Poet

kafir-e-ishq ko kya se kya kar diya

but ne haq ashna ashna kar diya

koi dekhe haqiqat mire kufr ki

main ne jis but ko puuja ḳhuda kar diya

parsa.i dhari rah ga.i shaiḳh ki

chashm-e-jadu-asar tu ne kya kar diya

dekhne vaale ka.aba samajhne lage

kitna raushan tira naqsh-e-pa kar diya

but-parasti men ki main ne vo bandagi

but-kade ko bhi qibla-numa kar diya

ai fana meri mayyat pe kahte hain vo

aap ne apna va.ada vafa kar diya