Kis Ko Sunaun Haal-E-Gham Koi Gham-Ashna Nahin

Poet

kis ko suna.un hal-e-gham koi gham-ashna nahin

aisa mila hai dard-e-dil jis ki koi dava nahin

meri namaz-e-ishq ko shaiḳh samajh sakega kya

us ne dar-e-habib pe sajda kabhi kiya nahin

mujh ko ḳhuda se ashna koi bhala karega kya

main to sanam-parast huun mera koi ḳhuda nahin

kaise ada karun namaz kaise jhuka.un apna sar

sehn-e-haram men shaiḳh-ji yaar ka naqsh-e-pa nahin

kya hain usul-e-bandagi ahl-e-junun ko kya ḳhabar

sajda rava kahan pe hai sajda kahan rava nahin

mujh se shuru-e-ishq men mil ke jo tum bichhaḌ ga.e

baat hai ye nasib ki tum se koi gila nahin

mujh ko rah-e-hayat men log bahut mile magar

un se mila de jo mujhe aisa koi mila nahin

apna bana ke ai sanam tum ne jo aankh pher li

aisa bujha charagh-e-dil phir ye kabhi jala nahin

ishq ki shaan marhaba ishq hai sunnat-e-ḳhuda

ishq men jo bhi miT gaya us ko kabhi ‘fana’ nahin