Dattatriya Kaifi
hal-e-dil kahne ko kahte ho to kab tum mujh ko
haa.e jis vaqt nahin tab-e-takallum mujh ko
ḳhaak ho kar bhi vahi hasrat-e-pa-bos rahi
ho ga.i mauj-e-saba mauj-e-talatum mujh ko
zo.af se haal ye patla hai rah-e-ulfat men
sail-e-girya pe bhi hasil hai taqaddum mujh ko
kahte hain zikr-e-shab-e-vasl pe kya janiye kyuun
kabhi sharm aur kabhi aata hai tabassum mujh ko
mo.ajiza hazrat-e-isa ka tha be-shubah durust
ki main duniya se gaya uTh jo kaha qum mujh ko
sail-e-girya ki badaulat ye hua ghar ka haal
ḳhaak tak bhi na mili bahar-e-tayammum mujh ko
un ko gin gin ke shab-e-hijr basar hoti hai
taare ankhon ke na kyuun hoven ye anjum mujh ko
hai gazi gaḌha hi ‘kaifi’ ka shi.ar aur visar
nahin darkar hai ye atlas-o-qaqum mujh ko
Leave a Reply