main ne un se jo kaha dhyan mira kuchh bhi nahin
haa.e kis naaz se hans hans ke kaha kuchh bhi nahin
arz ki kuchh dil-e-ashiq ki ḳhabar hai to kaha
haan nahin kuchh nahin bas kah to diya kuchh bhi nahin
tu na aaya shab-e-va.ada to gaya kya tera
mar miTe ham tire nazdik hua kuchh bhi nahin
kya hai anjam-e-mohabbat koi puchhe ham se
jite-ji ḳhaak men milne ke siva kuchh bhi nahin
kis ki mehr aur vafa ab hai jafa se bhi gurez
kyuun na jal kar kahen ulfat men maza kuchh bhi nahin
ankhon hi ankhon men dil le gaya siine se nikal
haath se ham ne diya us ne liya kuchh bhi nahin
mire allah ye patthar ki buton ka dil hai
rahm rusva.i ka Dar ḳhauf-e-ḳhuda kuchh bhi nahin
kaun sa dard hai jis ka nahin duniya men ilaaj
lekin is dard-e-mohabbat ki dava kuchh bhi nahin
dekha ‘kaifi’ ko to be-saḳhta yuun bol uThe
ab to bimar-e-mohabbat men raha kuchh bhi nahin
Leave a Reply