jab sar-e-bam vo ḳhurshid-jamal aata hai
zarre zarre pe qayamat ka jalal aata hai
phuul muskate hain lahrati hai Tahni Tahni
fasl-e-gul aate hi har shai pe jamal aata hai
vo janam-din pe bulate hain hamesha mujh ko
har naya saal ba-andaz-e-visal aata hai
kyuun tire honT mujhe dete hain manfi men javab
mere honTon pe ye rah rah ke saval aata hai
jab savali koi aa jaata hai dar par to mujhe
us ki baḳhshi hui ne.amat ka ḳhayal aata hai
un ke khilte hue joban ko vo murjha na saka
aane ko daur-e-ḳhizan sal-ba-sal aata hai
mujhe jachti hi nahin aur kisi ki surat
jab ḳhayal aata hai tera hi ḳhayal aata hai
taare ginvati hain phir hijr ki kaali raten
jab mujhe yaad koi zohra-jamal aata hai
yuun ruḳh-e-zard chamak uThta hai aane pe tire
jaise holi men koi mal ke gulal aata hai
apne hathon ke pale log jo ho jaa.en ḳhilaf
un ke aḳhlaq pe ai ‘charḳh’ malal aata hai
Leave a Reply