na.e jhagḌe nirali kavishen ijad karte hain
vatan ki aabru ahl-e-vatan barbad karte hain
hava men uḌ ke sair-e-alam-e-ijad karte hain
farishte dang hain vo kaam adam-zad karte hain
naya maslak naya rang-e-suḳhan ijad karte hain
urus-e-sher ko ham qaid se azad karte hain
mata-e-pas-e-ghairat bul-havas barbad karte hain
lab-e-ḳhamosh ko sharminda-e-faryad karte hain
hava-e-taza pa kar bostan ko yaad karte hain
asiran-e-qafas vaqt-e-sahar fariyad karte hain
zara ai kunj-e-marqad yaad rakhna us hamiyyat ko
ki ghar viran kar ke ham tujhe abad karte hain
har ik ḳhisht-e-kuhan afsana-e-derina kahti hai
zaban-e-hal se TuuTe khanDar fariyad karte hain
bala-e-jan hain ye tasbih aur zunnar ke phande
dil-e-haq-bin ko ham is qaid se azad karte hain
azaan dete hain but-ḳhane men ja kar shan-e-momin se
haram ke nara-e-naqus ham ijad karte hain
nikal kar apne qalib se naya qalib basa.egi
asiri ke liye ham ruuh ko azad karte hain
mohabbat ke chaman men majma-e-ahbab rahta hai
na.i jannat isi duniya men ham abad karte hain
nahin ghaTti miri ankhon men tariki shab-e-gham ki
ye taare raushni apni abas barbad karte hain
thake-mande musafir zulmat-e-sham-e-ghariban men
bahar-e-jalva-e-sub.h-e-vatan ko yaad karte hain
dil-e-nashad rota hai zaban uf kar nahin sakti
koi sunta nahin yuun be-nava fariyad karte hain
janab-e-shaiḳh ko ye mashq hai yad-e-ilahi ki
ḳhabar hoti nahin dil ko zaban se yaad karte hain
nazar aati hai duniya ik ibadat-gah-e-nurani
sahar ka vaqt hai bande ḳhuda ko yaad karte hain
sabaq umr-e-ravan ka dil-nashin hone nahin paata
hamesha bhulte jaate hain jo kuchh yaad karte hain
zamane ka moallim imtihan un ka nahin karta
jo ankhen khol kar ye dars-e-hasti yaad karte hain
adab ta.alim ka jauhar hai zevar hai javani ka
vahi shagird hain jo ḳhidmat-e-ustad karte hain
na jaani qadr teri umr-e-rafta ham ne collage men
nikal aate hain aansu ab tujhe jab yaad karte hain
Leave a Reply