Rizvan Anjum
zulmaten chhaTne ko aghaz-e-sahar kaafi hai
sar jhukane ke liye ek hi dar kaafi hai
koi talvar uThao na hi neza pakḌo
qatl karne ko sanam tir-e-nazar kaafi hai
mere roke na rukega to bhala kyon rokun
ab bichhaḌne ko tira azm-e-safar kaafi hai
hon mubarak ye mahallat ye daulat tujh ko
yaar ham ḳhana-badoshon ko safar kaafi hai
jis ki chhanv men falak-zad bhi aa kar baiThen
mere gaanv ko vahi ek shajar kaafi hai
ghar se niklun to sada saya-fagan rahti hain
maan mujhe teri duaon ka asar kaafi hai
jaisi karni hai yahan vaisi vahan bharni hai
ḳhair ko ḳhair bahut shar ko sharar kaafi hai
Leave a Reply