zindagi jaisa lubha.ungi chali ja.ungi
main tire ḳhvab men a.ungi chali ja.ungi
us ne dekha hi nahin azm-e-musammam mera
hijr oḌhungi bichha.ungi chali ja.ungi
ye kahani to musannif ki chalegi barson
main to kirdar nibha.ungi chali ja.ungi
main vo jugnu huun jo taron ke sahare ke baghair
bahr-e-zulmat miTa.ungi chali ja.ungi
zindagi mujh ko zara itni to mohlat dena
sham-e-ummid jala.ungi chali ja.ungi
jaan luTani bhi paḌi mujh ko vatan par jo kabhi
ḳhaak mathe pe laga.ungi chali ja.ungi
ik nazar dekh len bas ye miri ankhen tujh ko
ahd phir apna nibha.ungi chali ja.ungi
dil mira ho gaya jazbat se aari ‘mina’
ashk bhi ab na baha.ungi chali ja.ungi
Leave a Reply