Zindagi Aa Tera Arman Badal Kar Dekhen

zindagi aa tira arman badal kar dekhen

dil men hai jo mire mehman badal kar dekhen

sham-e-ummid ke manind mila hai koi

hijr ki dhuup ka unvan badal kar dekhen

us ne bakhsha hamen eazaz shanasai ka

kyuun na ham apni hi pahchan badal kar dekhen

meri ankhon men nae rang ubhar aae hain

sain ghar ka sar-o-saman badal kar dekhen

aql gul khud ko hai samjhe hue jo khak-nashin

us ke dil ka ye kabhi maan badal kar dekhen

dosh dete hain har ik baat pe halat ko jo

apne andar ka vo insan badal kar dekhen

fan ki duniya men nai subh ka suraj bo kar

aao ham apna gulistan badal kar dekhen

ham ujala hain ujalon se mohabbat hai hamen

fann-e-takhliq tiri shaan badal kar dekhen

zehn ki jhiil men khil uttha mohabbat ka kanval

dil men jo gham ka hai tufan badal kar dekhen

‘rumi’ puuja vo mukammal nahin hone deta

man ke andar hai jo bhagvan badal kar dekhen

Leave a Comment